Wednesday, May 04, 2005

إلى من يهمه الأمر

شيل هذا وحط هذا وضعنا بالصقله ــ المشكله مستقبلنا بيدهم احنا نتعب ونشقى وهم ياخذونها بارده مبرده ماهمهم منو شقى وتعب بس شلون نبوق ونصعد على ظهر فلان علشان نوصل بسرعه ــ سؤال محيرني شلون يطلع القرار ومنو صانع القرار ؟؟؟ ــ صايرين مثل النار كل ماحطيت فيها حطب كبرت وللأسف هم النار وحنا حطبها ـــ ولي يبي يوصل بسرعه يا إنه يقلقس ويتحيلق حق الراس العود ولا يصير معارض اللهم لا عتراض على حكمك وحكمتك ـــ خلونا انتمتع بالعز والرفاهيه الكذابه واسحبوا الزوليه من تحتنى شوي شوي وخلونا واقفين على الكاشي ـــ ولا في احد ماعنده وظيفه ولا ناطر وظيفه انزين إلي راح بره وتعلم وورد يبي يشتغل بلي تعلمه عدل ـ وهذا الشي الطبيعي بس عندنا لا مايصير طبعاً لازم يحطونك بمكان مخالف لمجال التخصص 180درجه علشان يشتغل وينتج بشي مايعرفه ها ولازم يُبدع بعد ـــ عيل شلون عيل ــ أو عنده فتامين واو علشان يحطونه بالمكان الي يبيه من وين يابوا هذى التفكير المبدع والعبقري ــ تلقاه فقير رايح ومتغرب علشان يخدم بمجال دراسته ويبي يسوي له مستقبل من حقه طبعاً شقى وتعب يبي النتيجه والنتيجه شنو بأنه يتفاجأ ــ لايوجد مكان شاغر ــ تبي شذي ولا كيفك تحمل ــ ادري "سامعينه من قبل ولا قارينه بس التاريخ يعيد نفسه "يبقى الحال على ماهو عليه وعلى المتضرر اللجوء للقضاء
الكلام طويل في هذا الموضوع متشعب بس لازم الواحد يطلع الي بقلبه ولا بينفجر ـــ صدقوني انا مابي اكسر مجاديف احد ولا اهون من عزيمته بس الصراحه صج اتعور بس تلاقيها بعدين راحه صدقوني انا واحد موشايل على احد والله العظيم وعندي وعندك خير والحمدلله والله سبحانه ساترها ولكن ابي افضفض شوي عن الهموم علشان يرتاح ويهدى البال شوي وبعدين مولازم الواحد يكون حايشه طشار ولا متأزم علشان يتكلم وين راح الإحساس بالناس اختفى اذا كان اختفى انا والحمدلله ماختفى لازلت احس واشعر بغيري
ثق بالله سبحانه يعورني قلبي اذا شفت احد بره من عيالنا محتاج ولا خربان ايني شي ودي اساعده ووقف معاه بس اقول في نفسي اخاف يردني واسكت وطالعه من بعيد وساعده من تحت لي تحت احاول اتعرف عليه ولا على احد من ربعه المهم اساعده وبس
وهذ الي ربينه ونشأنا إنا نوقف مع بعضنا بعض والواحد يصارح الثاني بس بدون تجريح طبعاً ،، هذي مونصيحه ولا عتب بس رساله إلى من يهمه الأمر واقول تبقى بس محور الحديث ادري قمت اخوره واخربط لكن قلت كل كلمه تطري على بالي يعني كلام ونثرته مثل ماينثرون العيش ويقولون اكلوه قالوها إلي قبلنا من جعل نفسه سبوس إلعبت فيه الدياي
اقول
اصفق الخمس بالخمس لاحول ولا قوه.....هم بلاني سلبني الحال والقوه
باقونا وانقولهم للأسف قوه.....من بمره هذا فلان سوه
وتقولي يافلان بيتك خربان سوه .....يردمونها ردم ويدارون سوه
لاحيله ولا قوه شفوا الشقردي شنو سوه
والسلامتكم وتعيشون

5 comments:

Sloth said...

e walla 9aj .. ma77ad iyqader a77ad.. il kil yan6er il zalla 3alshan yagthub'ha o iythillik feeha il 3omur killa ..
bas lail7een il amal mawjood.. alla yab3idna 3an kil shar :)

فارس هوى الكويت said...

sloth
تشرفنا بزيارتش
والله يبعدش عن كل شر
اكيد في امل ولا يأس مع الحياة ولاحياة مع اليأس :)

فارس هوى الكويت said...

q8-leo
بالضبط هذا الي قصدته
عيب علينا اذا شفنا صديق محتاج ولا انساعده
وعلى فكره مشكوره لأني من عشاق شعر الشافعي :)

esTeKaNa said...

يعطيك العافية اخوي
موضوع مهم وواقعي
نحن نحسن الظن بللله وهو سبحانة ما راح يخيب ظنا ،وكل انسان مقسوم له رزقة ولا يستطيع اي شخص مهما كان ان يوقف هذا الرزق،هذا اليقين يجعلنا نرتاح ويهون علينا واقعنا المؤلم....ما تتخيل شكثر احترمت فيك احساسك بالاخرين،هذا يعتبر رقي في أخلاقك،لا تتردد يوم في مساعدة شخص ومحاولة انتشاله من خطا يعيشة باسلوب يقربه منك ولا يبعده واحتسب هذا الاجر عند اللله وربي راح يسهل عليك...عسى الله يوفقك دنيا واخره
تحياتي:)

فارس هوى الكويت said...

Q8-Leo
مشكوره على اللنكات لاحظتهم ووايد حلوين :)

منوره
حياش الله ومشكوره على الكلام الطيب وعلى راي المثل
الصديق وقت الضيق