انا مو شاعر

آنا موشاعر آنا كتلة مشاعر

احس بالضيقه والفرح

وياليت قلبي انشرح

فيني شي يلمس الواقع

واشوف الحقيقه بشكل ساطع

المس هموم الناس

وانسى همي المحتاس

كلمه ارددها مع الأنفاس

آنا موشاعر آنا كتلة مشاعر

...........

...........

يمكن احس بالزمن

وابغض كل مايدور فيه من محن

وضوق ويلاته

وصيح ليلاته

واسمع صاحبي يندب مافاته

واغني على دقاته

آنا موشاعر آنا كتلة مشاعر

...........

...........

آه ياصيحة النهام

وحرقة اليوف و الأيام

عنوان الأمل و الأوهام

آنا موشاعر آنا كتلة مشاعر

...........

...........

حروف الحياة صعبة تنقال

وكم حافي ماسك نعال .....وانتوا بكرامه

الله يرحم الحال

عاشق يناظر اليال

والعاقل في باله سؤال؟؟

آنا موشاعر آنا كتلة مشاعر

............

............

الكل كل مايكبر يصغر

حكمة ربك خله السما تمطر

من يقدر على الألم يصبر

دم القلم على صفحه تسطر

آنا موشاعر آنا كتلة مشاعر

................................

سلامتكم وتعيشون

غربه

عجزت ابكي
عجزت اوصف
عجزت أ لملم جروحي
*****
الله اعلم بنوحي
وابقى للديرة ولهان
..
بعيد عنج يا روحي
اصبحت بقايه انسان
..
ابي اداوي جروحي
تعبت وكثرت الأحزان
..
فقدت أهلي وناسي
آه يا صيحة الشفقان
..
ليلي طويل وقاسي
وعندج ألقى الأمان
..
فيج ألقى إحساسي
إنتي تروين العطشان
..
اصرخ من قمة راسي
صدى ضايع بين الوديان
..
دمعي نشف ضاقت أنفاسي
إنتي الروح والشريان
..
لا تقولين إني لج ناسي
والله للظروف سلطان
..
حبي لج حب جنوني
ولا قيس الي بِليلى هيمان
..
تغربت والغربه ملتني
!!!ديرة ما فيها آذان

..
شلت همي على متني
وين ديرة الخير و العرفان
..
انا منها وهي مني
ديرتي ديرة فرسان
..
يا كويت العبرة خنقتني
آنا ولدج خذيني بالأحضان
.......
وسلامتكم وتعيشون

أم الوردي

غمزت لي وحده لابسه وردي
مزيونه والويه يشع بالظلمه
*****
تشققت وقلت اليوم من قدي
طبني العرق وحاشتني صدمه
*****

قلت شنو هالجمال إلي منج يندي
ما ردت قلت مستحيه ومنصدمه
*****
قعدت أقول كل إلي عندي
قلت شدعوه ردي علي بكلمه
*****
قالت وخر إنت منت قدي
سمعت الصوت قلت ليتها طرمه
*****
والله جنها طاقتني بمردي
قلت انت ريال لو حرمه
*****
قالت نص و نص يابعد كبدي
تعال يمي اسمي نسمه
*****
ياني طراق على خدي
قلت انتي مونسمه انت نقمه
*****
رجفت ووقف شعر يلدي
إخواني وبقيت ألمه
*****
داهن الشعر تقول هندي
طلع ثالث خواته وآنا محترمه
*****
طيري طلع مايجدي
بدال الحباره صاد لي ترمه
*****
الحظ ردي مصدي
ومن مشى حافي تحوشه لجمه
*****
هذا زماني يايدي
ما تعرف الريال من الحرمه
ـــــــــــــــــــــــــــــــــــــــــــــــــــــــــــــــــ
وسلامتكم وتعيشون

كتاتة فال

مرت يا حمد تمشي عدال
عباتها ململ والنفنوف قصير

*****
قلت في بالي هذا خيال
ياعين شوفي هل أمر الخطير

*****
سبحان من سواها وزانها بالجمال
شدهتني وجعلت قلبي يطير

*****
دنيت يمها قلت ممكن سؤال
يازينه ودي بقربكم وين بيتكم يصير ؟؟؟

*****
ياحمد ارمقتني بعينها ذيج الغزال
قالتي وخر عن طريجي يا الله طير

*****
قلت والله باقيكم بالحلال
والله اعلم بحالي هو فيني بصير

*****
ضحكت وقالت ياالله تعال
صارت تقودني اتقول كسير

*****
دخلت بيتهم ولا متروس يهال
قلت اخوانج يا ذا البدر المنير ؟؟

*****
قالت هذول عيالي طاح حظك ومال
قلت كلهم قالت إيي ياملعون الصير

*****
نشف عظمي وحاشني زلزال
غشيم وانا اعد نفسي خبير

*****
عيوز مركبه وظروسها طوال
يوم شالت البرقع طلعت خبزٍ خمير

*****
خشمها يا حمد تقول فندال
ناقصها مخمه ياخوي وتطير

*****
هذي قصتي مع كتاتة فال
حسبت اني مفتح طلعت ضرير

*****
دنا صوبي حمد وقال
وين ذيج الفطانه يافقير

*****
هذي دقه سواها فيك الريال
قالي بعد ما انبه الضمير

*****
كنت عند نفسي شاطر وطيحتي محال
واصبحت قطو طقوه ابمصير

ــــــــــــــــــــــــــــــــــــــــــــــــــــــــــــــــــ

وسلامتكم وتعيشون

ذكرى

دمعي تفجر من ذكرت طاريه
ياخذني شوقي لِحلو الوصايف
*****
دمع الحشا محدٍ درا فيه
الوقت عندي معجف عجايف
*****
اقفى وخلاني بالهم وبكاويه
إنصفوني يا أهل النصايف
*****
الهم بيوفي اخشه ولا وين اوديه
سطرت ايامي على بيض الصحايف
*****
نصفوني ولا بشيل قلبي وبنفيه
خبروه يا هلي تراه عنده لايف
*****
لو يشيب الراس ماني ناسيه
وين ريم الفلا ترف الشفايف
*****
ذبحني زريف الطول بطواريه
همت بدنياه وحق دنياي عايف
*****
هذا زماني وهذي بلاويه
حالتي قشره والوقت عندي زايف
*****
حبه سطا قلبي وماني بقاويه
الروح عنده والجسد بقصر نايف
ــــــــــــــــــــــــــــــــــــــــــــــــــــــــ

سلامتكم وتعيشون

عشره على عشره

خشفٍ بدا لي عشره على عشره
كنه البخت يترس ليلي بنوره
******
خفيف الظل طيب البشره
ترف الحشا تقولون صوره
******
صغير السن مابين الثلاثين والعشره
شوفته ترد الروح والقلب تتفتح زهوره
******
بِلاياه أشهد إنها عِيشتٍ قشره
مركب غرامي طبع ببحوره
******
غاب عني القمر من عليه أشره
شرهتي على إلي طلع من طوره
******
عيني ماشافت مثل طيب العِشره
ويين ضاع البدر وانطوى نوره
******
ضاقت الوسيعه بيذيعوني بآخر النشره
والزمن يا ناس عار فيني عوره
ـــــــــــــــــــــــــــــــــــــــــــــــــــــــــــ
وسلامتكم وتعيشون

ليتني طفل

ليتني طفلٍ رضيع توني مفطوم

مايعرف إلا حلو المعاني

**

وشبقى فيني من الأمس واليوم

الجسد فاني وهمي احتواني

**

يلزم علي الدهر تلزوم

اصبر واسمع كل من هجاني

**

محسوب يانفس من عالي القوم

شريفٍ و الكل يحلم بمكاني

**

اصبحت راعي اناظر سما ونجوم

وين الذي بقيته وبقاني

**

هملني وأنا لاشك محروم

وين الثرى ليته خذاني

**

حشى ماظقت لذة النوم

وشلون ينام كل من يعاني

**

لاني مطرود ولا مذموم

حسبي على الوقت إلي لك هداني

**

فرضٍ فرضته وأنا فيه مجزوم

تساوت عندي الساعات والثواني

ـــــــــــــــــــــــــــــــــــــــــــــــــــــ

وسلامتكم وتعيشون

بلا عنوان

يانفس ورى الزمن عليج دار
صرتي غريبه لاعرفج ولا تعرفيني

خليتيني محمل متروس اسرار
آه لويحسون بعض البشر فيني
ذبحني الشوق لأهل الدار
وين الذي يدورني ويبيني
ضايع مابين السوالف والأفكار
هواجيس ارجوج يانفس صارحيني
هل آنا ضرير واصمخ مايدري شصار
ولا بيدي ضيعت سنيني
ياترف الحشى انا بداخلي نار
وإنت الوحيد إلي تداويني
دواي عندك لا تخلق اعذار
إسمع صدى صوتي وأنيني
أنا عزيز النفس مو راعي أوكار
والدنيا الحلوه حشى ماتغريني
ولاني من إلي يخلقون أعذار
حبك بداخلي مكنون وصورتك بعيني
إنفض هم الزمن والأمرار
وشوف سوات الدهر فيني
والروض مايجيك منه غبار
خوفك من إلي فرق بينك وبيني
تذكرتك يوم سلبت الأنظار
تذكرت السوالف إلي بينك وبيني
سيدي يانسل الأخيار
أنا اسد ضيعت عريني
والقلب إن شلع عن الجسد وطار
تراه بِحط عند عاقد الحاجبيني
إن سمعت عني وشاعوني بالأخبار
إعرف ترى جرحك صار جرحيني
**********************

وسلامتكم وتيعشون

إلى من يهمه الأمر

شيل هذا وحط هذا وضعنا بالصقله ــ المشكله مستقبلنا بيدهم احنا نتعب ونشقى وهم ياخذونها بارده مبرده ماهمهم منو شقى وتعب بس شلون نبوق ونصعد على ظهر فلان علشان نوصل بسرعه ــ سؤال محيرني شلون يطلع القرار ومنو صانع القرار ؟؟؟ ــ صايرين مثل النار كل ماحطيت فيها حطب كبرت وللأسف هم النار وحنا حطبها ـــ ولي يبي يوصل بسرعه يا إنه يقلقس ويتحيلق حق الراس العود ولا يصير معارض اللهم لا عتراض على حكمك وحكمتك ـــ خلونا انتمتع بالعز والرفاهيه الكذابه واسحبوا الزوليه من تحتنى شوي شوي وخلونا واقفين على الكاشي ـــ ولا في احد ماعنده وظيفه ولا ناطر وظيفه انزين إلي راح بره وتعلم وورد يبي يشتغل بلي تعلمه عدل ـ وهذا الشي الطبيعي بس عندنا لا مايصير طبعاً لازم يحطونك بمكان مخالف لمجال التخصص 180درجه علشان يشتغل وينتج بشي مايعرفه ها ولازم يُبدع بعد ـــ عيل شلون عيل ــ أو عنده فتامين واو علشان يحطونه بالمكان الي يبيه من وين يابوا هذى التفكير المبدع والعبقري ــ تلقاه فقير رايح ومتغرب علشان يخدم بمجال دراسته ويبي يسوي له مستقبل من حقه طبعاً شقى وتعب يبي النتيجه والنتيجه شنو بأنه يتفاجأ ــ لايوجد مكان شاغر ــ تبي شذي ولا كيفك تحمل ــ ادري "سامعينه من قبل ولا قارينه بس التاريخ يعيد نفسه "يبقى الحال على ماهو عليه وعلى المتضرر اللجوء للقضاء

الكلام طويل في هذا الموضوع متشعب بس لازم الواحد يطلع الي بقلبه ولا بينفجر ـــ صدقوني انا مابي اكسر مجاديف احد ولا اهون من عزيمته بس الصراحه صج اتعور بس تلاقيها بعدين راحه صدقوني انا واحد موشايل على احد والله العظيم وعندي وعندك خير والحمدلله والله سبحانه ساترها ولكن ابي افضفض شوي عن الهموم علشان يرتاح ويهدى البال شوي وبعدين مولازم الواحد يكون حايشه طشار ولا متأزم علشان يتكلم وين راح الإحساس بالناس اختفى اذا كان اختفى انا والحمدلله ماختفى لازلت احس واشعر بغيري

ثق بالله سبحانه يعورني قلبي اذا شفت احد بره من عيالنا محتاج ولا خربان ايني شي ودي اساعده ووقف معاه بس اقول في نفسي اخاف يردني واسكت وطالعه من بعيد وساعده من تحت لي تحت احاول اتعرف عليه ولا على احد من ربعه المهم اساعده وبس

وهذ الي ربينه ونشأنا إنا نوقف مع بعضنا بعض والواحد يصارح الثاني بس بدون تجريح طبعاً ،، هذي مونصيحه ولا عتب بس رساله إلى من يهمه الأمر واقول تبقى بس محور الحديث ادري قمت اخوره واخربط لكن قلت كل كلمه تطري على بالي يعني كلام ونثرته مثل ماينثرون العيش ويقولون اكلوه قالوها إلي قبلنا من جعل نفسه سبوس إلعبت فيه الدياي

اقول

اصفق الخمس بالخمس لاحول ولا قوه.....هم بلاني سلبني الحال والقوه

باقونا وانقولهم للأسف قوه.....من بمره هذا فلان سوه

وتقولي يافلان بيتك خربان سوه .....يردمونها ردم ويدارون سوه

لاحيله ولا قوه شفوا الشقردي شنو سوه

والسلامتكم وتعيشون

كلام طالع من صميم القلب

البعد عن أبواب الملوك

إن الملوك بلاء حيثمـا حلـوا .....فلا يكن لك في أبوابهـم ظـلو
ماذا تؤمل من قوم ٍ إذا غضبوا ......جاروا عليك وإن أرضيتهم ملوا
فاستغن بالله عن أبوابهم كرمـاً .......إن الوقوف علـى أبوابهـم ذل

الامام الشافعي

ــــــــــــــــــــــــــــــــــ

هذه مقدمه حبيت اقولها قبل لا ادخل بالموضوع وهوعباره عن كلام الله يعلم بانه طالع من القلب وهذا ماقصد فيه التحريض بالعكس اقصد فيه الاصلاح لمجتمع بدى ياكل بعضه البعض للأسف

اقول

الله يعينك

الله يعينك يالكويتي تدعو ربك يحل قيدك

تفكر بقرضك ولا قصدك ولاتشوف كم رصيدك

ولاتفكر بالامه وتنطر متى ينحل

هذا يصرح وذاك يعارض ومخلينك لين صدى قيدك

الله يعينك....

وشلنا احنى بالامه كلٍ يبي تصيره له لمه

شراره وتنفجر الامه ومحد خايف على امه ......قصدي الكويت

كل مافيك السانك وتحط يدك على خدك

الكل بسوي له تمثال وها جدامك احسن مثال

وشلي نابنه من هالامه

دام في واحد حاذف امه ويقولك بس انا إلي افيدك

....الله يعينك

انت تصيح وانا صيح يارب ترحم عبيدك ملتمين على الدنيا

ناسين حالتك متدنيا شنو نابنه من هالامه غير ضغطك عالي برصيدك

انت ترمي وهذا يرمي

والامه ياخذ صيدك

.....الله يعينك

معتفسه وصارت رديه الكل يحسبك عيديه

ومنتى عارف متى عيدك

يالمقرود دشيت بالأسهم

هذول لك بس اخذهم وانت تاكل منهم

اصبر تلفت وراك اتشوف الكل بصيدك

.....الله يعينك

ولما الدش بالامه اتقول وين انا واقف

انا بصرح ولا بواجف

الكل يدور حمال

بياخذ ميوتك ولا ميدك

.....الله يعينك

اصبر شوي وبطل عينك

وشنو يطلع بيدك

يمكن في احد ياخذ ايدك

ويحلك من صدىقيدك

....الله يعينك

وللحديث بقيه هذا الجزء الأول من سلسله الله يعينك ..........................

انا والقلم

قالوا لي انت شاعر وانا بصراحه مومقتنع اقول اني صديق للقلم لااكثر ولا اقل اي شي يطري علي أو اشوف شي اكتب عنه ..

وهذا الي انا كتبته

....

ساير ياصاح الزمن وهله...إنصعب لزمن عليك تو وهله

وإن جار عليك قل هلا ومرحبا وهله ...راح يجيك يوم تعرف مكانك ودارك

حتى لو بعدت عن اهلك وربعك ودارك ...وهذا الزمن ومردك دارك

الدار دارك وهذا الزمن وهله

......

فكر بالزمن ياصاح وفرده...وخذلك منه نمونه وفرده

كم و كم ماعرف صاحبه وفرده...وهذي ملامح زمن حالي

هذا زمنه يالله نفسي وحالي...ماهمهم ياصاح حالك وحالي

صحح مسيرك وفرده لايكون حالك كما حالي

........

بيني وبين إلي أوده نافذه...شفافه روحه وللعالم نافذه

لودرى معزته في قلبي نافذه...حشا ماغاب عن بالي ليله

وحالي كما إبن الملوح مع ليله...ماتغفي العين وإنت غايبٍ ليله

بالي يزورك كل ليلةٍ ليله...ارجوك خلني صاحبك ليله

وأنا انصبت في ليله وحكمت الله في عبده نافذه

ـــــــــــــــــــــــــــــــــ

وسلامتكم وتعيشون هذا بعض الي كتبته

شكر خاص

اشكر الي اقنعني وخلاني اسوي البلوق وقوله مشكور وماقصرت

وعلى فكره هذا الشخص موبس خلاني اسوي البلوق لا ساعدني بشغلات وايد لاتعد ولاتحصى في حياتي وانا الحين جدامكم اقوله مشكور ومشكور ومشكور وانا مهما سويت ماراح اسدد ووقف له وقفه احترام خاص يليق فيه واطلب من الله سبحانه ان يحرسه وويفقه في طريجه

الصعب

وعساك على القوه

ـــــــــــــــــــــــــــــــــــــــــــــــــ